Sürücülər üzüləcək; 60 manatlıq cərimə 100 manata qaldırılır

Tarix
06.05.2014
Oxunub
1020 dəfə
Müəllif
Sürücülər üzüləcək; 60 manatlıq cərimə 100 manata qaldırılır

Milli Məclisin mayın 2-də keçirilən iclasında deputat Rəfael Cəbrayılov “Yol hərəkəti haqqında” Qanun layihəsinə dəyişikliklərdən danışarkən bildirib ki, xüsusi siqnallarla təchiz olunmuş avtomobillərə yol verilməməsi ilə bağlı qayda pozuntusunu digər qayda pozuntusu ilə müqayisədə təhlükəlidir. “Söhbət yol polisi, yanğınsöndürən, təcili yardım maşınlarından gedir. Sürücülər polis maşınlarına yol verirlər. Bunun səbəbləri aydındır. Yanğınsöndürən maşınlara da yol verilir. Çünki onların qabariti böyükdür və toqquşma təhlükəsi baxımından onlara da yol verilir. Lakin təcili yardım maşınlarına yol verilməməsi çox geniş yayılıb. Burada insan sağlamlığından söhbət getdiyi üçün məsələ daha təhlükəlidir». R.Cəbrayılov bəzi təkliflər verib: «Qanun layihəsinin 151-ci maddəsində sadalanan əməllərlə birgə 60 manat cərimə olunma ayrı bir maddədə verilməlidir. Nəzərə çatdırım ki, Milli Məclisin belə bir təcrübəsi var. Piyadaların keçid zolağı üzərinə çıxan andan onlara sürücü tərəfindən yol verilməsini iki il bundan öncə ayrı bir maddədə yerləşdirdik. Təbii ki, bu da lazımı effekt verdi. Xüsusi səs siqnalları, sayrışan işıqlarla təchiz olunmuş avtomobillərə yol verilməməsinə görə inzibati məsuliyyət 151.2-ci maddədən çıxarılıb ayrıca maddədə verilsin və sanksiya ən azı 100 manata kimi qaldırılsın».

Milli Məclisin Hüquq siyasəti və dövlət quruculuğu komitəsinin üzvü olan Rafael Cəbrayılov Avtosfer.az-a açıqlamasında bildirib ki, bu cür qayda pozuntusuna yol verən sürücülərə qarşı cərimə sanksiyası mütləq artırılmalıdır: «Bu gün təcili yardım maşınına, yanğınsöndürən maşina yol verilməməsi sürücülər tərəfindən adi bir hala çevirilib. Yəni bu, sözsüz ki, sürücülük mədəniyyətinin aşağı olması ilə bağlı olan bir məsələdir. Amma mən bunu təkcə sürücülük mədəniyyətinin aşağı olması ilə bağlamaq istəməzdim. Bu həm də insanın mənəvi keyfiyyətləri ilə bağlı olan bir məsələdir. Düşünürəm ki, insanlarımız kamil olsaydı, bu məsələni qanunvericiliyə daxil etməyə də ehtiyac qalmazdı. Çünki qanun mənəviyyatla bağlı məsələlərə o vaxt müdaxilə edir ki, artıq bunu tənzimləmək lazım gəlir».

Deputat əlavə edib ki, təcili yardım və yanğınsöndürən maşınları hər bir insanın qapısına gələ bilər. Odur ki, sürücülər yolda bu maşınları görəndə ilk növbədə yol hərəkəti qaydalarını, sonra isə mənəvi dəyərləri üstün tutub yol verməlidirlər: «Əfsuslar olsun ki, təcili yardım maşınında ölümlə çarpışan insanın tibb müəssisəsinə çatdırılmasına imkan vermirlər, yol vermirlər. Və yaxud da mənzili yanan bir insanın evinə köməyə gedən yanğınsöndürən maşina yol vermirlər. Bunlar mənəviyyatla bağlı olan məsələlərdir və əfsuslar olsun ki, bizdə bu cür hallar hələ də var».

Bu baxımdan, deputat hesab edir ki, İnzibati Xətalar Məcəlləsində bu məsələni ayrıca bir maddə şəklində tətbiq etmək lazımdır. Rafael Cəbrayılov təklif edir ki, təcili yardım və yanğınsöndürən maşınlarına yol verməyən sürücülərə qarşı məsuliyyət sərtləşdirilməli və cərimənin sanksiyası artırılarsa məsələ həllini tapmış olar: «Hətta, 100 manata qədər sanksiya nəzərdə tutmaq lazımdır. Mən düşünmürəm ki, bu gün kimsə yanğınsöndürən maşını və yaxud da təcili tibbi yardım maşınını tanımasın. Hətta onun üzərində ambulans sözü belə tərsinə yazılıb ki, sürücü içəridə salonu göstərən güzgüdən, yaxud da yan gözgülərdən baxında o ambulans sözünü düz oxuya bilsin. Görsün ki, bu, ambulansdır. Yəni, bu qədər tədbirlər görülüb».

Qeyd edək ki, Rafael Cəbrayılov indiyədək parlamentdə bir sıra qanun layihələrinə təkliflər verib və əksəriyyəti də qəbul olunub.

Artıq sözügedən məsələ ilə bağlı Prezident Adminstrasiyasında yeni layihə hazırlanır. Belə ki, xüsusi səs siqnalı və sayrışan işıqları olan nəqliyyat vasitələrinə, yəni, polis, yanğınsöndürən, təcili yardım və bu kateqoriyaya aid olan digər nəqliyyat vasitələrinə yol verməməyə görə cərimə sanksiyası 100 manata qədər artırılacaq. Üstəlik, deputat Rafael Cəbayılovun təklif etdiyi kimi, bu nəqliyyat vasitələrinə yol verməməklə bağlı məsələ İnzibati Xətalar Məcəlləsində ayrıca maddədə əks olunacaq.

Qeyd edək ki, hazırda təcili yardım, yanğınsöndürən və digər bu tipli nəqliyyat vasitələrinə yol verməməyə görə 60 manat cərimə nəzərdə tutulurdu.


PEDAL.AZ saytda yerləşdirilən banner və reklam məzmununa görə məsuliyyət daşımır.
Məlumatdan istifadə etdikdə istinad mütləqdir.
Məlumat internet səhifələrində istifadə edildikdə müvafiq keçidin qoyulması mütləqdir