Flavio Briator Bakıda “Formula-1” keçirib 40 milyon qazanacaq

Tarix
08.05.2014
Oxunub
1185 dəfə
Müəllif
temp-thumb
Flavio Briator Bakıda “Formula-1” keçirib 40 milyon qazanacaq

“Bu yarışlar üçün lazım olan bütün infrastrukturu tikməyiblər”.

“Formula-1” yarışlarının icraçı direktoru Benni Ekkloustoun avtomobil yarışlarının dövrələrindən birinin Bakıda keçiriləcəyini təsdiqləyib.

Pedal.Az Virtualaz.org-a istinadən xəbər verir ki, bu barədə “The İndependent” qəzeti yazır. 

B.Ekkloustoun deyib ki, “Formula-1”in Cənubi Koreyada keçirilən Qran-pri yarışları ləğv olunub və onun əvəzində yarışların dövrələrindən birini Azərbaycanda keçirmək qərara alınıb.

B.Ekkloustoun deyib ki, bu, Cənubi Koreyada yarışlar üçün ayrılmış trasın bərbad vəziyyətdə olması ilə bağlıdır. “Mən bir daha ora qayıtmayacağam” deyə B.Ekkloustoun bildirib.

“Formula-1”in icraçı direktoru deyib ki, artıq yarışların mərhələlərindən birinin Bakıda keçirilməsinə dair müqavilə imzalanıb.

“Bu yarışlar 2015-ci ildən başlayacaq və Koreyanı əvəz edəcək” - deyə o bildirib.

B.Ekkloustoun deyib ki, Azərbaycan yarışları keçirmək üçün yaxşı tras tikib: 

“Ancaq bir şeyi yaddan çıxarıblar ki, bu yarışlar üçün lazım olan bütün infrastrukturu tikməyiblər”.

Qəzet yazır ki, “Formula-1” yarışlarının Bakıda keçirilməsinə dair razılıq “Renault F1 Team” komandasının əsasını qoyan Flavio Briatorun vasitəçiliyi ilə əldə olunub.

“Briator Azərbaycan prezidenti ilə əlaqə yarada bilib və o, yarışların Bakıda keçirilməsinə razılıq verib” - deyə məlumatda bildirilir.

Gözlənilir ki, “Formula-1”in Bakıda keçiriləcək mərhələsi F.Briatora ildə 40 milyon dollar gəlir verəcək.

PEDAL.AZ saytda yerləşdirilən banner və reklam məzmununa görə məsuliyyət daşımır.
Məlumatdan istifadə etdikdə istinad mütləqdir.
Məlumat internet səhifələrində istifadə edildikdə müvafiq keçidin qoyulması mütləqdir