Cərimə balları dəyişdirilir

Tarix
25.04.2014
Oxunub
1131 dəfə
Müəllif
temp-thumb
Cərimə balları dəyişdirilir

“Sürücülər artıq 12 yox, 20 bal topladıqda nəqliyyat vasitələrini idarə etmək hüququ məhdudlaşdırılacaq”.

Azərbaycanda bəzi yol hərəkəti qaydalarının pozulmasına görə cərimə balları tətbiq ediləcək. 

 Bu barədə Milli Məclisin Hüquq siyasəti və dövlət quruculuğu komitəsinin üzvü Çingiz Qənizadə məlumat verib. 

Deputatın sözlərinə görə, Milli Məclisin mayın 2-də keçiriləcək iclasında İnzibati Xətalar Məcəlləsinin 28.3-cü maddəsinə dəyişiklik edilməsi nəzərdə tutulub. Dəyişikliyə əsasən, İXM-in 151.4-cü maddəsində göstərilən balla qiymətləndirilən xətaların yol verilməsinə görə sürücülər bir il ərzində hazırda tətbiq edildiyi kimi 12 yox, artıq 20 və daha çox bal topladıqda inzibati cərimə tətbiq edilmədən onların nəqliyyat vasitələrini idarə etmək hüququ məhdudlaşdırılacaq: 

“Niyə? Çünki İnzibati Xətalar Məcəlləsinin bir neçə maddəsində aşağı bal nəzərdə tutulmasına baxmayaraq, biz orada balların həddini qaldırmışıq. Yəni bu xətalara görə həm cərimə, həm də 5 bal tətbiq ediləcək. Bundan əlavə, 151-ci maddənın bir neçə bəndində əvvəllər cərimə balı ilə cəzalandırılmayan qayda pozuntuları bundan sonra balla qiymətləndiriləcək. Ona görə də balların bu həddini qaldırdığımıza görə sürücülər artıq 12 yox, 20 bal topladıqda nəqliyyat vasitələrini idarə etmək hüququ məhdudlaşdırılacaq”.

Millət vəkili əlavə edib ki, “Yol hərəkəti haqqında” qanunun 27-ci maddəsinin 2-ci hissəsinin 2-ci bəndinə də əlavə və dəyişiklik edilməsi gözlənilir. Həmin əlavə və dəyişikliklərdə avtomobillərin qeydiyyatı ilə bağlı yeni tələblərin ortaya qoyulması nəzərdə tutulur: "İnzibati xəta törədən və ya avtoxuliqanlıq edən şəxslərin vaxtında tapılması üçün avtomobilin ilkin və təkrar qeydiyyatı zamanı avtomobil sahiblərinin telefon nömrələri, elektron poçt ünvanları, dəqiq iş yerləri və digər məlumatların götürülməsi nəzərdə tutulur”.

Qeyd edək ki, bir müddət əvvəl Daxili İşlər Nazirliyinin Baş Dövlət Yol Polisi İdarəsinin İctimaiyyətlə əlaqələr şöbəsinin rəisi polis polkovniki Kamran Əliyev Trend-ə açıqlamasında bildirmişdi ki, general-polkovnik Ramil Usubovun imzası ilə Prezident Administrasiyasına təqdim olunan təkliflər zərfində bir sıra məsələlərlə yanaşı, Azərbaycanda yol hərəkəti qaydalarının pozuntusuna görə bal sisteminin ləğvini nəzərdə tutan təklif də yer alıb.

Xatırladaq ki, mövcud qanunvericiliyə görə, sürücülər bir il ərzində 12 və daha çox bal topladıqda, nəqliyyat vasitələrini idarə etmək hüququndan məhrum edilirlər. (Trend)

PEDAL.AZ saytda yerləşdirilən banner və reklam məzmununa görə məsuliyyət daşımır.
Məlumatdan istifadə etdikdə istinad mütləqdir.
Məlumat internet səhifələrində istifadə edildikdə müvafiq keçidin qoyulması mütləqdir